Instituto Nashonal pa Derecho Humano a nombra dos miembro suplente pa Hulanda Karibense: Sra. Solange Christiaan i Sr. Gerald Simmons-de Jong. E Gabinete di minister a aprobá nan nombramentunan awe, despues di un proposishon di Sekretario di Estado pa Hustisia i Seguridat, Arno Rutte. E miembronan suplente nobo di e Instituto a wòrdu nombrá pa un periodo di tres aña.
Un di e responsabilidatnan di e Instituto ta pa evaluá kasonan individual di diskriminashon. Esaki ta basá riba e asina yama legislashon di trato igual. Ta spera ku e legislashon di trato igual aki ta konta pa Boneiru, Sint Eustatius, i Saba entrante promé di yanüari 2026. Christiaan i Simmons-de Jong lo emití un desishon riba kehonan di diskriminashon riba e islanan di akuerdo ku e legislashon aki.
Amplia e ròl di e Instituto na Hulanda Karibense mas aleu
Tur dos miembro di Instituto suplente ta trese konosementu (hurídiko) amplio i eksperensia na Hulanda Karibense. Ku nan yegada, e Instituto ta ekspandé mas ainda su aktividatnan i ekspertisio na Hulanda Karibense.
Solange Christiaan a sirbi dies aña como hues na Korte Komun di Hustisia di Aruba, Curaçao, Sint Maarten, y Bonaire, Sint Eustatius, y Saba. Promé ku esei, ela traha komo hues na vários lokalidat na Hulanda Oropeo i komo abogado na Houthoff Buruma N.V. na Rotterdam. Tambe e ta dosente na Universiteit van Curaçao i ta miembro di direktiva di Fundashon Shimaruku. E fundashon aki ta sostene muchanan vulnerabel y mamanan hoben na Ser’i Papaya, Kòrsou.
Gerald Simmons-de Jong ta e fundadó di e bufete di abogado DEJONG. E bufete aki tin ofisina na Saba i Sint Maarten i pronto lo habri su portanan na Boneiru. Simmons-de Jong no ta solamente un abogado pero tambe un mediadó i ta kondusí un promedio di aproksimadamente 15 mediashon anualmente, prinsipalmente riba e Islanan Ariba: Saba, Sint Eustatius, i Sint Maarten. Tambe e ta un kandidato eksterno pa doktorado na Universiteit van Curaçao Dr. Da Costa Gomez, spesialisá den supervishon intergubernamental di Islanan BES i ta duna lès na Universidat den e áreanan di Derecho di Reino, Derecho Konstitushonal, i Derecho Atministrativo. Tambe el a traha pa hopi aña komo hues suplente pa Korte Komun di Hustisia di Aruba, Kòrsou, Sint Maarten, i di Boneiru, Sint Eustatius, i Saba, i komo konsehero di maneho pa Entidat Públiko di Saba. Pa e último organisashon aki, el a traha entre otro riba implementashon di legislashon di trato igual na Hulanda Karibense.