Entrante yanüari 2026, Instituto Nashonal pa Derecho Humano lo hasi uso di e fasilidatnan di Korte Komun di Hustisia di Aruba, Kòrsou i Sint Maarten i di Boneiru, Sint Eustatius i Saba. Awe, Rick Lawson, presidente di e Instituto, i Mauritsz J. de Kort, presidente di e Korte Komun, a firma un kontrato pa formalisá esaki. E Instituto lo utilisá e lokalidat pa husga kasonan di diskriminashon riba e islanan Boneiru, Sint Eustatius i Saba.
Imágen: © Corte Conhunto di Husticia di Aruba, Curaçao, Sint Maarten y di Bonaire, Sint Eustatius y Saba
Firmamentu di e akuerdo dor di Mauritsz J. de Kort (na drechi) i Rick Lawson (na drechi riba pantaya), den presensia di Maya Soumah, gerente di proyekto di Hulanda Karibense na Kolegio (na robes riba pantaya)
Lei di Trato Igual pa Hulanda Karibense
Dia 7 di òktober 2025, Eerste Kamer a aprobá e implementashon di e Lei di Protekshon kontra Diskriminashon pa Boneiru, Sint Eustatius i Saba. E implementashon aki ta enserá ku for di yanüari 2026, habitantenan di e islanan lo por hasi un apelashon riba e lei si nan ta sinti ku nan a wòrdu diskriminá. Den e kuadro aki ta bai establesé un servisio kontra diskriminashon riba e islanan ku ta integrá den un fasilidat di ayudo hurídiko mas amplio. E fasilidatnan aki lo kuminsá duna servisio den e promé mitar di 2026. Adishonalmente, habitantenan lo por entregá un keho di diskriminashon independiente na e Instituto. Habitatenan lo tin e opshon pa pidi un huisio di diskriminashon serka e Instituto òf opta pa mediashon.
Presensia físiko di Instituto riba e islanan
Pa ehersé su mandato nobo, e Instituto lo hasi uso di e fasilidatnan di Korte Komun di Hustisia di Boneiru, Sint Eustatius i Saba pa seshonnan di huisio. Esaki ta brinda e posibilidat pa kasonan por ta tratá personalmente. E kolaborashon ta un paso importante pa garantisá derecho i solushon igual kontra diskriminashon na Hulanda Karibense, meskos ku loke ta posibel kaba na Hulanda Oropeo.