Entrante promé di yanüari 2026 Lei Protekshon kontra Diskriminashon lo drenta na vigor na Boneiru, Sint Eustatius, i Saba. Esaki lo duna Instituto Nashonal pa Derecho Humano responsabilidatnan adishonal riba e islanan. Habitantenan di Hulanda Karibense, meskos ku na Hulanda Oropeo, lo por entregá un keho na e instituto independiente di derechonan humano si nan ta kere ku nan a wòrdu diskriminá. E Instituto lo husga si diskriminashon a tuma lugá. Tin bia mediashon ta mas efektivo, i den e kaso ei, e Instituto lo ofresé e posibilidat aki. Den e kuadro aki, Solange Christiaan y Gerald Simmons-de Jong a wòrdu nombrá komo miembronan suplente di Instituto Nashonal pa Derecho Humano pa husga kehonan for di Hulanda Karibense. Rick Lawson, presidente di e Instituto, lo bishitá tur tres isla e siman aki pa topa ku organisashonnan importante. Tambe e lo bishitá e lokalidatnan di e Instituto riba e islanan.
Imágen: © College voor de Rechten van de Mens
Maya Soumah (lider di proyekto Hulanda Karibense na Instituto), Jonathan Johnson (Gobernador di Saba) i Rick Lawson (presidente di Instituto) na e lokalidat na e Entidat Públiko Saba
Lokèt Hurídiko i Legal Desk na e islanan
Tur hende meresé un trato igual i akseso na hustisia. Ta p’esei ta establesé un Lokèt Hurídiko na Boneiru, i ta bai ekspandé e Legal Desks ku a wòrdu pilotá na Sint Eustatius i Saba. Kuminsando den e promé mitar di 2026, habitantenan di e islanan por bai einan pa asistensia grátis ku preguntanan tokante nan derechonan i eksperensianan ku diskriminashon. Esaki ta inkluí preguntanan tokante hür, empleo, debe òf benefisionan. Nan por yuda tambe si un hende ta sinti ku nan a wòrdu tratá inhustamente, por ehèmpel, pa motibu di nan nashonalidat, embaraso òf desabilidat.
Ora ta trata di diskriminashon i trato desigual, Lokèt Hurídiko òf Legal Desk tambe por yuda habitantenan entregá un keho na Instituto Nashonal pa Derecho Humano. Huntu e organisashonnan aki ta pèrkurá pa habitantenan di Hulanda Karibense ta mihó protehá i por haña e yudansa korekto mas lihé. Tambe, habitantenan mes lo por entregá un keho direktamente na e Instituto entrante promé di yanüari 2026.
Presensia di Instituto Nashonal na e islanan
Solange Christiaan y Gerald Simmons-de Jong a wòrdu nombrá pa huzga kasonan di diskriminashon riba e islanan. Nan ta trese ku nan konosementu i eksperiensia (hurídiko) amplio den e parti Karibense di Hulanda. Por ehèmpel, Solange Christiaan a traha diesun aña komo hues na Korte Komun di Hustisia di Aruba, Kòrsou, Sint Maarten, i Boneiru, Sint Eustatius, i Saba. Gerald Simmons-de Jong tambe ta fundadó di e bufete di abogado DEJONG, ku ofisinanan na Saba, Sint Maarten, i pronto tambe na Boneiru. Banda di esaki a nombra Moramay Koomen komo konsehero hurídiko di Instituto. E lo atendé kehonan di diskriminashon.
"Ta bunita pa mira ku e legislashon pa trato igual lo konta tambe pa Boneiru, St. Eustatius, i Saba. Nos tur ta biba huntu den komunidatnan chikitu aki, i e ta berdaderamente un sosiedat di ‘ons kent ons’ No ta semper fásil pa eskpresá esaki ora bo ta sinti bo mes diskriminá. Nos ta spera ku e residentenan lo sinti nan mes mas empoderá dor di e Instituto pa denunsiá trato desigual,” asina miembro suplente di e Instituto Simmons-de Jong a bisa.
Ku e adishonnan nobo aki, Instituto Nashonal ta sigui ekspandé su aktividatnan i ekspertisio na Hulanda Karibense. E Instituto lo usa e lokalidatnan di Korte Komun di Hustisia riba tur tres isla pa tene oudiensia. Banda di husga kehonan di diskriminashon, e Instituto tambe ta duna konseho, hasi investigashon, i duna informashon tokante derechonan humano na Hulanda Karibense.