E derechi riba un ambiente di bida limpi, saludabel, i sostenibel ta na peliger na Hulanda Karibense

Den e artíkulo akí, e Kolegio pa Derechi di Hende ta eksplorá kon e derechi riba un medio ambiente limpi, saludabel i sostenibel ta wòrdu garantisá na Hulanda Karibense. Nos ta analisá tambe unda e ta kai kòrtiku i kua responsabilidat gobièrnu lokal i gobièrnu hulandes ta karga. E asuntunan di maneho di shushi na Boneiru ta wòrdu usá komo un ehèmpel ilustrativo. E kaso akí ta ilustrá kon konsiderashon insufisiente di derechi humano den maneho i ehekushon por pone e derechi riba un ambiente limpi, saludabel i sostenibel na peliger. Tambe nos ta wak e konteksto úniko di e islanan: nan vulnerabilidat ekológiko, nan eskala chikí, i nan posishon spesial den Reino Hulandes ta pone ku protekshon efektivo ta nesesario pero tambe kompliká. E artíkulo ta amplia riba e rapòrt anual di derechi humano na Hulanda na 2023: e derechi riba un medio ambiente limpi, saludabel i sostenibel (parti 1).

1. Dikon esaki ta un asuntu di derechi humano

Protekshon di medio ambiente ta estrechamente mará na protekshon di derechi humano. Si hende ta wòrdu eksponé pa un largu tempu na polushon di airu, supstansia peligroso, òf nan kondishonnan di bida ta wòrdu strobá, i gobièrnu no ta protehá nan for di e efektonan dañino di polushon di ambiente nan derechinan humano por ta na peliger. Ehèmpel ta e derechi riba bida (artíkulo 2 EVRM), e derechi riba bida privá, di famia i di kas (artíkulo 8 EVRM), e derechi riba salú (artíkulo 12 IVESCR), i e derechi riba un nivel di bida adekuá (artíkulo 11 IVESCR).

Den e kuadro legal ku e Kolegio a publiká na 2024, nos a splika kon polushon di medio ambiente i daño na naturalesa tin konsekuensianan no solamente ekológiko pero tambe pa derechi humano. Tantu kortenan nashonal komo kortenan internashonal di derechi humano a rekonosé ku estadonan tin obligashon positivo pa protehá nan siudadanonan di daño di medio ambiente serio si esaki ta afektá nan derechinan.

Na aprel 2024, e Korte Europeo di Derechi Humano a dikta den e kaso KlimaSeniorinnen kontra Suisa ku maneho di klima inadekuá por, bou di sierto sirkunstansianan, konstituí un violashon di artíkulo 8 di EVRM. Na yüli 2025, e Korte Internashonal di Hustisia tambe a konfirmá den un opinion di konseho ku e derechi riba un medio ambiente limpi, saludabel i sostenibel ta un derechi humano independiente bou di derechi internashonal. Segun e korte, un ambiente saludabel ta un kondishon nesesario pa ehersé otro derechi humano. Hasiendo esaki, e korte a enfatisá ku estadonan, inkluso Hulanda, no por kumpli ku nan obligashonnan di derechi humano sin tambe aktivamente protehá medio ambiente. Hasta si e derechi ainda no a wòrdu pone den lei.

Hurisprudensia hulandes tambe ta mustra e importansia di derechi humano

Tambe tin desishon di korte den Reino Hulandes mes ku ta konfirmá e dimenshon di derechi humano den e protekshon di medio ambiente. Un ehempel den e parti Karibense di e Reino Hulandes ta e desishon tokante refineria Isla na Kòrsou. Na 2021, e korte di Hustisia di Aruba, Kòrsou, Sint Maarten, Boneiru, Sint Eustatius, i Saba a bisa ku gobièrnu no a kumpli ku e derechi riba bida privá i di famia pa motibu ku no a vigilá e kalidat di airu na un manera adekuá. E korte a haña ku a pone muchu tiki atenshon na e riesgonan potensial pa salú i otro efektonan negativo ku ta bini pa motibu di e polushon. Tambe e korte a haña ku gobièrnu no a informá e siudadanonan sufisiente tokante e riesgonan. Ademas, e gobièrnu no a hasi kla kua medidanan a wòrdu tumá pa realmente redusí e polushon di airu. Asina gobièrnu di Kòrsou no a kumpli ku su deber di kuido bou di artíkulo 8 di EVRM.

Adishonalmente, dia 11 di yanüari 2024, ocho residente di Boneiru, huntu ku Greenpeace Hulanda, a kuminsá un proseso hurídiko kontra di e estado hulandes. Nan ta reklamá ku nan derechinan humano ta wòrdu violá pasobra e estado no ta hasi sufisiente pa protehá e residentenan di Boneiru kontra e efektonan di kambio di klima. E kaso akí ta trese un dimenshon legal nobo den e perspektiva di Reino, komo ku ta promé biaha ku residente di Hulanda Karibense ta eksigí protekshon di klima a base di derechi humano. Hasiendo esaki tambe nan ta pone enfasis riba protekshon igual den komparashon ku e residentenan na Hulanda Europeo. E parti supstansial di e kaso akí lo tuma luga na òktober 2025.

Den e konteksto akí, protekshon di medio ambiente na Hulanda Karibense no mester wòrdu mira solamente komo maneho di klima i medio ambiente, sino tambe komo un asuntu di derechi humano. E desishon di e Korte Internashonal di Hustisia ta konfirmá ku maneho di medio ambiente i klima na Hulanda Karibense mester kontribuí ku e realisashon di derechi humano. Esaki ta pone un responsabilidat sentral riba tantu gobièrnu hulandes komo outoridatnan lokal. E obligashon akí ta rekerí maneho proaktivo i efektivo, akseso na informashon, i protekshon hurídiko na tantu Hulanda Europeo komo Karibense.

2. E situashon na Boneiru: prosesamentu di shushi bou di preshon

E situashon rondó di e landfill na Lagun Boneiru, manehá pa prosesadó di shushi Selibon, ta mustra kiko ta pasa ora maneho di medio ambiente ta kai kòrtiku i derechi humano no ta wòrdu protehá adekuadamente. Pa añanan, material residual peligroso a wòrdu wardá i prosesá aki sin protekshon adekuá pa e hendenan i e medio ambiente. Pa añanan, e landfill no tabatin un pèrmit bálido, miéntras ku asbèst, desperdisio médiko i otro material peligroso tabata presente na e sitio. Kandela spontáneo ku ta krea huma pisá, molèster di holó, i kehonan di salú bou di e residentenan lokal tabata tuma luga regularmente. Pa añanan kaba e habitantenan rònt di e bario Lagun ta ekspresá nan preokupashon tokante e huma, molèster di holó, i riesgonan potensial pa salú. Nan ta reportá kehonan manera doló di kabes i problema ku hala rosea. Si e kehonan di salú akí por wòrdu atribuí direktamente na e situashon na Selibon no a wòrdu investigá ainda. Sinembargo, vários dokumento, inkluyendo un publikashon resien despues di un petishon di “Woo” (Wet open overheid; petishon pa divulgá informashon di gobièrnu), ta mustra ku e sitio di landfill a forma un riesgo pa salú for di 2013.

E Inspekshon di Medio Ambiente Humano i Transporte (ILT) a atvertí repetidamente di e seriedat di e situashon. Rapòrt, karta di organisashonnan sosial manera Pro Lagun, i komunikashon ofisial di e representante di estado no a laga espasio pa duda: esaki ta un degradashon struktural i serio di medio ambiente, ku konsekuensianan potensialmente dañino pa salú públiko. Den un rapòrt di investigashon di 2023, e investigadónan a atvertí di e riesgonan pa salú públiko. Nan a papia di ‘eksposishon króniko na emishon di e insinerashon di desperdisio i e efekto di di huma no kimá kompletamente pa oranan largu’. Apesar di esaki, pa hopi tempu ningun intervenshon struktural a wòrdu tumá. Te na novèmber 2024 e representante di estado interino Jan Helmond a remplasá formalmente e Kolegio Ehekutivo pa motibu di negligensia di trabou.

Na febrüari 2025, korte a konfirmá e seriedat di e situashon i e hustifikashon pa e medida, pero tambe a bisa ku mester a duna e Kolegio Ehekutivo mas tempu pa pone su asuntunan na òrdu. E korte a sostené parsialmente e akshonnan di e representante di estado, pero tambe a kritik’é pa no a permití e gobièrnu lokal un oportunidat final pa resolvé e asuntu. Helmond a aseptá e desishon akí a traspasá responsabilidat pa e medidanan pa Kolegio Ehekutivo, ku awor tin e tarea di implementá nan i garantisá nan integrashon struktural den maneho lokal.

Enfoká riba e kousanan struktural for di un perspektiva di derechi humano

E medidanan implementá pa Helmond a aliviá e riesgonan un tiki. Esaki a inkluí sigurá kònteinernan ku desperdisio ku ta kontené asbèst, mehorá e tranké i seguridat di e sitio, i warda i kita desperdisio biomédiko temporalmente. Sinembargo, e motibunan struktural pa e probelmanan ku e prosesamentu di desperdisio no a wòrdu resolvé. Esaki ta inkluí e ousensia di un sistema di lisensia robusto, kapasidat di maneho limitá, i e eksklushon di partisipashon di e públiko den tumamentu di desishon.

E habitantenan lokal tambe a tuma pasonan hurídiko awor. Stichting Pro Lagun, un organisashon ku ta representá residentenan lokal, a entregá un karta di apelashon. Den dje, e organisashon ta argumentá ku e gobièrnu ta violando su deber di kuido pa motibu ku e no ta tuma sufisiente akshon kontra e daño kontinuo di ambiente i e riesgonan pa salú na e landfill. E paso akí ta mustra ku e residentenan ta sinti nan mes obligá pa para pa nan derechi riba un ambiente di bida sigur. E ta enfatisá tambe e posishon vulnerabel di siudadano ora gobièrnu no ta duna supervishon, maneho i protekshon adekuá.

For di un perspektiva di derechi humano, e situashon akí ta afektá diferente derechi. E ousensia prolongá di un pèrmit, e fayo pa enforsá regulashon na tempu, i e falta di transparensia i partisipashon ta afektá e derechi riba salú (artíkulo 12 IVESCR), e derechi riba rèspèt pa bida privá i di famia (artíkulo 8 EVRM), i e derechi riba akseso na un remedi efektivo (artíkulo 13 EVRM). Ademas no por mira e situashon akí los for di e falta di supervishon na un manera struktural i e posishon desigual di e islanan den e Reino Hulandes. E kaso di Selibon ta mustra kiko ta pasa ora derechi humano no ta wòrdu husa komo guia pa maneho di medio ambiente: intrankilidat sosial, konfliktonan hurídiko, konfiansa den gobièrnu ku ta bai atras, i un menasa direkto pa salú públiko.

3. Tres isla: konteksto úniko, derechi igual

Miéntras ku e situashon na Boneiru ta presentá un ehèmpel mas urgente, e ambiente di bida na Saba i Sint Eustatius tambe ta bou di preshon. E tres islanan ta diferensiá den tamaño, poblashon, kultura i naturalesa. Tòg tur tres ta enfrentá retonan similar den e protekshon di nan ambientenan frágil. Segun e rapòrt State of Nature in the Caribbean Netherlands 2024, e estado di naturalesa riba tur tres isla ta den kondishon moderá te malu. Progreso den maneho di naturalesa i medio ambiente ta keda limitá.

Riba Sint Eustatius, e bashamentu deskontrolá di shushi di kas i konstrukshon ta soru pa polushon di tera i awa. Hopi bia desperdisio ta wòrdu bentá direktamente den medio ambiente, loke ta trese riesgonan serio pa salú públiko i e medio ambiente marino. Komementu di yerba dimas entre otro dor di kabritu los tambe ta kontribuí na eroshon di tera aselerá i daño na reservanan natural. E grupo di konservashon di naturalesa STENAPA ta atvertí di skarsedat severo di finansiamentu, komo ku no ta duna sosten finansiero struktural for di Hulanda. Miéntras ku organisashonnan di naturalesa den provinsianan ta risibí supsidio, organisashonnan di naturalesa na Hulanda Karibense ta kai entre dos stul.

Saba tambe ta lucha ku e komementu di yerba dimas dor di kabritu los, problemanan den prosesamentu di desperdisio, i kapasidat limitá pa konservashon di naturalesa. E kapasidat di e ehekutivo lokal ta limitá, meskos ku e disponibilidat di konosementu spesialisá. Esaki ta hasié difísil pa protehá naturalesa vulnerabel. Tantu Saba komo Sint Eustatius ta situá den e faha di orkan, kaminda tormenta tropikal i orkan regularmente ta kousa daño signifikante na infrastruktura i naturalesa. Esaki ta pone mas preshon riba e kapasidat di naturalesa pa rekuperá.

Finalmente, komo un isla abou, Boneiru ta partikularmente vulnerabel pa e efektonan di kambio di klima, inkluyendo subida di nivel di laman, salinisashon di terenonan agrikultural, i daño na refnan di koral. Esaki ta intensifiká e retonan di medio ambiente eksistente, manera sobrekargá di e ekosistemanan debí na e konstrukshon riba e kosta, turismo i polushon. Ademas, tin molèster kousa pa sargassum (lima ku ta drif) i problema struktural den prosesamentu di desperdisio, inkluyendo e problemanan menshoná anteriormente na e landfill na Lagun.

Problema di medio ambiente kompartí riba Boneiru, Sint Eustatius i Saba

Un prekupashon ku tur tres isla ta komparti ta e deterioro di ref di koral. E refnan akí ta duna protekshon natural na e kosta, ta esensial pa piska, i ta un fuente importante di entrada pa medio di turismo. Nan deterioro—entre otro debí na kambio di klima, polushon di awa, malesa di koral, i piskamentu dimas,— ta afektá no solamente biodiversidat, pero tambe medionan di subsistensia, seguridat di kuminda i herensia kultural.

Dokumento di maneho, evaluashon legislativo, i señal di organisashon lokal ta mustra ku e implementashon di e maneho di medio ambiente riba e islanan hopi bia ta inadekuá den práktika. Progreso ta keda limitá debí na obstakulonan struktural manera insufisiente finansiamentu, maneho suak, i falta di partisipashon di e públiko. E retonan akí ta bira mas difísil dor di e realidat atministrativo: atministradónan lokal hopi bia tin diferente area di tarea, tin sosten limitá, i rara bes tin konosementu spesialisá riba medio ambiente. Esaki ta hasié difísil pa sigui un maneho sostenibel i konsistente.

Loke e islanan tin en komun ta ku e infrastruktura hurídiko i atministrativo pa protekshon di medio ambiente ta ménos fuerte ku na Hulanda Europeo. Na mes momento, e opservashon akí ta rekerí matis. E relashon entre Hulanda Europeo i Hulanda Karibense ta histórikamente desigual i polítikamente sensitivo. E konteksto akí ta pidi pa kuido, komprenshon di tur dos banda i tumamentu di desishon na un manera transparente. Aunke e problemanan di medio ambiente ta varia na un nivel lokal, e konsekuensianan ta keda afektá e mesun derechinan humano: e derechi riba salú, riba bida, riba un nivel di bida adekuá, i riba partisipashon den e medio ambiente di bida propio. E derechinan akí ta konta pa tur habitante di Reino, pero praktika ta mustra ku nan protekshon ta reparti na un manera desigual.

4. Responsabilidat di gobièrnu hulandes i outoridat lokal

Ta henter Reino Hulandes, no Hulanda so, ta parti di mayoria tratado internashonal. Pa Hulanda Karibense ku for di 2010 ta forma parti di Hulanda, gobièrnu hulandes tin e responsabilidat final pa ehekushon di e tratadonan akí. E tempo ei, gobièrnu a skohe pa no implementa tur lei Hulandes mesora. E restrikshon legislativo akí a soru ku legislashon na Hulanda Karibense hopi bia ta antikuá i tratadonan di derechi humano hopi bia no ta wòrdu implementá ainda. Na 2021, gobièrnu a adoptá e prinsipio di comply or explain. Bou di e prinsipio akí, lei na Hulanda Karibense generalmente mester ta meskos ku na Hulanda Europeo, a ménos ku personalisashon ta nesesario pa motibu di e posishon i karakterístika úniko di e islanan. Den e kaso ei gobièrnu mester splika dikon e desviashon ta hustifiká i kua protekshon alternativo e ta ofrese. Responsabilidat pa sostené derechi humano na Hulanda Karibense ta keda e responsabilidat di tantu e Kolegio Ehekutivo komo gobièrnu hulandes. Bou di derechi internashonal, derechi humano mester ta protehá igual den henter e teritorio di Hulanda. Si no tin sufisiente kapasidat, konosementu, òf rekurso na nivel lokal, gobièrnu hulandes tin e deber di duna sosten. E Kolegio pa Derechi di Hende ta argumentá ku e prinsipio di comply or explain ta esensial den e sentido akí. Si gobièrnu hulandes no ta ekstendé norma òf obligashon na Hulanda Karibense, e mester splika dikon esaki no ta sosodé i kua protekshon alternativo ta wòrdu ofresé. Hustifikashon den e forma akí frekuentemente ta falta òf ta insufisiente.

5. Kiko e Kolegio ta hasi?

E Kolegio pa Derechi di Hende ta e órgano di supervishon di derechi humano pa henter Hulanda, inkluyendo Hulanda Karibense. E paisnan autonomo di Aruba, Kòrsou i Sint Maarten ta kai pafo di e mandato akí. E Kolegio pa Derechi di Hende ta sigui vigilá i hala atenshon riba e problemanan di medio ambiente ku ta konserní derechi humano na Hulanda Karibense. Den su Strategia i Plan di Multi-Aña 2025-2027, e Kolegio a pone pa su mes e meta pa kontribui na redukshon di desigualdad huridiko entre residentenan di Hulanda Europeo i Hulanda Karibense. Den e konteksto akí:

• e Kolegio ta tene diskushon ku e ministerionan, inspekshonnan, órganonan atministrativo i otro organisashonnan relevante;
• e Kolegio ta sigui raportá señal i problema na outoridatnan di supervishon internashonal;
• e ta kontribuí na e kresementu di konosementu i konsientisashon di e situashon na Hulanda Karibense;
• i ta duna konseho solisitá i no solisitá riba desaroyo di maneho, lei, i impakto di derechi humano riba e islanan.

6. Konklushon

E situashon na Hulanda Karibense ta mustra ku e derechi riba un medio ambiente limpi, saludabel i sostenibel no ta algu evidente riba su mes. E problema di shushi na Boneiru i e asuntunan di medio ambiente mas amplio riba tur tres isla ta demostrá e nesesidat pa akshon. E temanan riba medio ambiente akí ta profundamente konektá ku desishon atministrativo, retonan sosioekonómiko, i e relashon desigual históriko entre Hulanda Europeo i Hulanda Karibense. Den práktika, esaki regularmente ta soru pa protekshon desigual di derechi humano.

E rekonosementu di e derechi riba un medio ambiente limpi, saludabel i sostenibel dor di e Korte Internashonal di Hustisia a bolbe konfirmá ku estadonan, inkluyendo Hulanda, tin un deber pa protehá e derechi akí i e derechinan humano asosia ku esaki. Esaki ta partikularmente importante pa e residentenan di área chikí i vulnerabel manera Hulanda Karibense.

Den e kuadro hurídiko publiká pa e Kolegio pa Derechi di Hende na 2024, nos a enfatisá kaba ku e protekshon di e derechi riba un medio ambiente limpi, saludabel i sostenibel riba e islanan mester wòrdu fortalesé for di un perspektiva di derechi humano. Esaki ta rekerí kompromiso di tantu outoridat lokal komo gobièrnu hulandes. Solamente dor di rekonose, garantisa i aplika igualmente e derechi riba un medio ambiente saludabel por efektivamente protehá e derechinan humano di tur residente den Reino. P’esei e Kolegio ta yama pa un aserkamentu struktural i basá riba derechi humano pa e maneho di medio ambiente riba e islanan.