Kua derechonan mi tin ora ta trata mi datonan personal registrá?

Bo tin e siguiente derechonan (artíkulo 12 – 23, Ordenansa General di Protekshon di Datonan, òf OGPD) relashoná ku e prosesamentu di bo datonan personal:

  • Derecho di informashon tokante kua datonan personal e Kolegio pa Derechonan Humano ta registrá di bo;
  • Derecho di kontrolá e registrashon ku ta kontené bo datonan personal;
  • Derecho di korekshon, limitashon òf eliminashon di bo datonan personal;
  • Derecho di oposishon kontra e prosesamentu di bo datonan personal;
  • Derecho pa retirá bo outorisashon pa e prosesamentu di bo datonan personal;
  • Derecho pa entregá un keho tokante e prosesamentu di bo datonan personal.
  • E derechonan ariba no ta apliká ora bo datonan personal ta wòrdu prosesá den kuadro di un petishon pa investigashon di posibel diskriminashon basá riba leinan di trato igual (prosedura di desishon).

Pa publikashon di e desishonnan di e Kolegio, tin ‘reglanan di publikashon’ establesé pa protehá e privasidat di e persona (natural) ku ta konserní.

Prosesamentu outomatisá di datonan personal i “profiling” (artíkulo 22 OGPD) no ta tuma lugá na e Kolegio. E derechonan ku ta relashoná ku esakinan tampoko ta apliká. Meskos ta konta pa e derecho di transferibilidat di datonan (artíkulo 20 OGPD).

Uso di derechonan di privasidat

Petishon di privasidat

Bo por manda un petishon di privasidat na e Kolegio pa Derechonan Humano na atenshon di e Privacy Officer. Download e formulario di petishon di privasidat (pdf), yena e formulario i mand’é via e-mail (privacy@mensenrechten.nl) òf via pòst na:

College voor de Rechten van de Mens

t.a.v. de Privacy Officer

Postbus 16001

3500 DA Utrecht

E Kolegio por suministrá abo ku informashon únikamente tokante bo mes datonan personal i no di otro hende konserní.

Importante: e formulario ta destiná solamente pa pregunta tokante e datonan personal ku e Kolegio ta prosesá di bo.

Si bo pregunta ta trata un kaso (koriente) tokante un keho ku ta trata di un trato (des)igual, bo derechonan ta limitá. Por ehèmpel, basá riba e derechonan menshoná ariba, bo no por risibí un kopia di bo fail kompleto, koregí kontenido di bo kaso, òf oponé bo kontra dje. Esaki bo por hasi solamente durante e prosedura mes i despues di e publikashon di e desishon. Pa esaki tin un reglamento separá, e petishon regular pa kontrolá. Den un kaso asina, tuma kontakto direktamente ku e Kolegio.

E kontenido di un petishon di privasidat

Un petishon di privasidat mester kontené, e siguiente informashon en todo kaso:

  1. Nòmber i inisialnan
  2. Fecha di nasementu
  3. Adrès residensial
  4. Kódigo postal/lugá di biba
  5. Number di telefòn
  6. Eventualmente number di fail òf number di desishon
  7. E kontenido di bo petishon. Esaki por ta:
  • un lista di e datonan personal ku e Kolegio tin di bo;
  • un lista di bo datonan personal ku a ser suministrá na otro instansia;
  • kontrolá bo datonan personal den e kaso ku bo a entregá;
  • blokeo di bo datonan personal;
  • suspenshon temporario di registrashon di dato;
  • suspenshon temporario di mandamentu di boletin;
  • opheshon kontra e prosesamentu di bo datonan personal;
  • korekshon di bo datonan personal;
  • añadidura na bo datonan personal;
  • (no) eliminashon di bo datonan personal;
  • otro tipo di adaptashon di bo datonan personal (indiká kua adaptashon bo ta deseá).
  1. E motibu di bo petishon di privasidat.

Registrashon i konfirmashon di risibimentu

Despues di risibí bo petishon, esaki ta wòrdu registrá i bo ta risibí un konfirmashon di risibimentu. Despues, e petishon ta ser tratá i evaluá pa e Privacy Officer.

Obligashon di identifikashon

E Kolegio pa Derechonan Humano ta registrá datonan sensitivo frekuentemente.
Si bo ta pidi un lista di bo datonan personal òf bo ke kambia datonan, nos mester ta sigur ta ken bo ta. Esaki ta pa prevení ku nos kambia bo datonan sin mas òf duna bo datonan na un otro persona sin bo pèrmit.

Pa e motibu aki, e Privacy Officer (òf un otro empleado) lo tuma kontakto ku bo via un karta, e-mail òf telefòn pa disidí kon e identifikashon adishonal lo tuma lugá.

Término

Despues di identifikashon, bo petishon lo wòrdu tratá inmediatamente (òf mas lihé posibel). En todo kaso den ménos ku un luna, kontá for di e momentu ku e petishon a ser risibí, bo lo wòrdu informá tokante e ehekushon di bo petishon. E Kolegio por aprobá òf rechasá un petishon. Den ámbos kaso, e desishon lo wòrdu motivá.

Si e petishon ta kompliká òf si tin un kantidat grandi di petishon, e término di un luna por ser prolongá ku dos luna mas. Bo lo wòrdu informá tokante esaki dentro di un luna despues di e risibimentu di bo petishon.

Gastunan

Normalmente, e Kolegio no ta kobra nada pa trata bo petishon. Sinembargo, si bo petishon ta hopi ekstenso, bo por wòrdu pidí pa paga un kompensashon rasonabel.
E kantidat lo wòrdu determiná segun e tamaño di e petishon.

Pregunta

Si bo tin pregunta tokante e manera di entregá òf trata bo petishon di privasidat, bo por yamá òf manda un e-mail pa e Privacy Officer di e Kolegio.

E number di telefòn ta 030 – 8883888. E e-mail ta privacy@mensenrechten.nl

Si bo tin un pregunta pa e Funshonario di Protekshon di Datonan di e Kolegio, manda un e-mail na fg@mensenrechten.nl.

Entregá un opheshon?

Si bo no ta di akuerdo ku e desishon di e Kolegio tokante bo petishon di privasidat, bo por presentá un opheshon formal na e Direktor di e Kolegio. E opheshon mester wòrdu presentá denter di seis (6) siman despues ku e desishon a wòrdu publiká (artíkulo 6:7 di “Algemene wet bestuursrecht” òf “Awb”).

Un opheshon mester kontené, en todo kaso, e siguiente informashon (artíkulo 6:5 Awb):

  1. Nòmber i adrès di e persona ku ta entregá e opheshon;
  2. Fecha di entrega;
  3. Deskripshon di e desishon kontra kua e opheshon òf apelashon ta dirigí;
  4. Motibu di e opheshon.

E Direktor normalmente lo tuma un desishon den seis siman despues di risibí e opheshon (artíkulo 7:10, insiso 1 “Awb”). Si bo no ta di akuerdo ku e desishon riba bo opheshon, bo por apelá na e tribunal atministrativo. E término pa presentá un opheshon òf apelashon na e hues atministrativo ta seis siman.

Entregá un keho?

Si bo ke entregá un keho tokante e manera ku e Kolegio a prosesá bo datonan personal? Òf si bo no ta satisfecho ku e manera ku bo petishon tokante bo datonan personal a wòrdu tratá, bo por presentá un keho na e instansia di supervishon (e “Outoridat di datonan personal”) òf bo por entregá un apelashon na korte.