Tur hende tin derecho di un bida normal. Esaki ta konosí tambe komo seguridat di supsistensia òf un nivel di bida desente. Esaki ta nifiká ku bo por kumpli ku bo nesesidatnan básiko. Esaki ta inkluí, por ehèmpel, akseso na bibienda, kuido di salú i edukashon. Na Hulanda Karibense sinembargo, seguridat di supsistensia ta bou di hopi preshon. E kostonan di bida haltu ta un problema grandi. Por ehèmpel, ta difísil haña bibienda pagabel. E rekursonan di gobièrnu pa seguridat sosial no ta organisá di e mesun manera ku na Hulanda Oropeo tampoko. Un otro problema ta e akseso limitá na transporte públiko riba e islanan. Riba e página aki, nos lo profundisá mas tokante e puntonan aki i kon nan por wòrdu mehorá.

Introdukshon di e mínimo sosial na 2024 no ta sufisiente

Dia 1 di yüli 2024 a introdusí e mínimo sosial na Hulanda Karibense. Esei ta e entrada mínimo nesesario pa proveé ​​pa nesesidatnan básiko. For di 1 di yüli 2024, e salario mínimo segun lei riba e islanan tambe a wòrdu ahustá pa kuadra ku e mínimo sosial aki. Esei ta nifiká ku un hende mester gana por lo ménos e montante ei pa luna. E Instituto ta kontentu ku e introdukshon di esaki i pa hopi tempu a boga p’e. Sinembargo gobièrnu mester tuma mas akshon. 

Ménos yudansa di gobièrnu

E provishonnan di seguro sosial ta hunga un ròl importante den kombatimentu di pobresa. E areglonan aki ta ofresé yudansa na hende pa paga pa nesesidatnan di bida. Ehèmpelnan ta inkluí:

  • Plaka pa yu i presupuesto mará na yu. Plaka pa yu ta un suma mensual pa hendenan ku tin un yu bou di 18 aña. E presupuesto mará na yu ta komplementá e suma aki pa sierto famianan ku ménos rekurso.
  • Seguro pa inkapasidat laboral: un montante mensual pa esnan ku no por traha pa motibu di malesa òf un aksidente.
  • Pago di asistensia sosial: un montante pa luna pa hende ku no ta gana sufisiente pa por paga pa tur kos.

Seguronan sosial, manera e AOW (Lei di Penshun di Behes General) i WW (Lei di Seguro di Desempleo), tambe ta importante. Empleadonan ta paga pa esakinan nan mes, segurando ku nan ta haña entrada despues di baha ku penshun òf si nan pèrdè nan trabou.

Sinembargo, habitantenan di Hulanda Karibense no tin akseso na e mesun rekursonan ku na Hulanda Oropeo. Por ehèmpel, no tin WW (Lei di Seguro di Desempleo) òf presupuesto mará na yu na e islanan. Ademas, tin diferensianan signifikante den kon ta manehá inkapasidat laboral. Tòg, e benefisionan i seguronan aki ta netamente loke ta nesesario pa kombatí pobresa na Hulanda Karibense. E salario mínimo ta insufisiente pa hopi famia por kumpli kuné.
 

Derechi riba bibienda bou di preshon riba tur tres isla

Ademas, hopi habitante di Boneiru, Sint Eustatius, i Saba tin hopi difikultat pa haña bibienda pagabel. Esaki ta pone e derecho di bibienda na peliger. Tin plannan pa traha mas bibienda, pero hopi biaha esakinan ta tarda. Pasonan mas konkreto ta nesesario pa garantisá sufisiente bibienda pagabel.

Na mes momento, no ta tur e supsidionan di hür ku ta konta na Hulanda Oropeo ta disponibel ainda na Hulanda Karibense. Hustamente pa personanan ku un entrada mas abou, e supsidio di hür di gobièrnu ta duna un kontribushon signifikativo na nan hür. Asina nan ta sobra mas plaka pa otro nesesidatnan.

Mester di mas transporte públiko

Tin poko òf niun transporte públiko na e islanan. Por ehèmpel, no tin apsolutamente niun transporte públiko disponibel na Boneiru i Sint Eustatius. Un proyekto temporal ta andando aktualmente na Saba pa tèst transporte públiko na e isla.

E falta di transporte públiko ta resultá den gastunan haltu pa e habitantenan por bai di un lugá pa otro. Mayoria hende mester tin un outo. Pa bai trabou, pa hiba nan yunan skol i otro aktividatnan, i pa bai hasi kompra. Siendo doño di un outo tambe ta enserá gastunan signifikante: e preis di e outo mes, gasolin i mantenshon. Pero sin outo, hopi hende no por yega nan trabou, pues nan no tin entrada. Nan ta dependé di un outo karu pa por proveé den nan nesesidatnan di bida.

E falta di transporte públiko pues tin un impakto grandi riba vários derecho humano di habitantenan na e islanan, manera e derecho di salú, trabou, tempu liber i bida privá. Mester di mas transporte públiko pa mehorá e situashon.

Faktornan latente tambe ta kontribuí na pobresa

Hopi faktor ta kontribuí na pobresa riba e islanan. Pero e asuntunan latente tambe ta influensiá tur e faktornan aki. E konteksto i historia di e islanan ta hunga un ròl signifikante i no por wòrdu mirá den separadamente. E efektonan di e komersio di katibu Trans-Atlántiko i historia kolonial ta parti klave den esaki. Otro faktor manera e naturalesa na eskala chikí di e islanan, kultura i kresementu di poblashon tambe mester wòrdu konsiderá. Maneho pa atendé ku pobresa mester tene kuenta ku e faktornan aki.

Aserkamentu mas amplio ta nesesario

P’esei e seguridat di supsistensia ta kore peliger na Hulanda Karibense pa motibu di diferente problema. Segun e Instituto, esaki ta rekerí un aserkamentu den kua gobièrnu ta atendé ku tur aspekto. E Instituto ta urgi gobièrnu pa konsiderá kuidadosamente e vários derechonan humano huntu: e derecho di bibienda, salú, seguridat sosial, edukashon, protekshon hurídiko i kombatí diskriminashon.

Gobièrnu mester enbolbí habitantenan di Hulanda Karibense i representantenan di nan interesnan den desaroyo di manehonan nobo. Tambe mester konsiderá kuidadosamente e konteksto i historia di e islanan. Ta e ora ei so nan por kuminsá hasi e diferensianan entre Hulanda Karibense i Oropeo mas chikitu ora ta trata di supsistensia.