Mas ku 100 persona ta traha na e Instituto, ku e meta pa protehá derecho humano den Hulanda Karibense i Oropeo. Nan tur tin diferente tarea. Nos tin miembronan di e Instituto ku ta evaluá kehonan di diskriminashon i ta determiná si diskriminashon a tuma lugá segun lei. Nos tin tambe koleganan ku ta hasi investigashon, skirbi rapòrtnan di konseho, duna informashon òf komuniká ku públiko. I tin hende ku ta sòru pa e Instituto sigui funshoná sin problema, manera koleganan den ICT, finansa i maneho di edifisio.

Kon e struktura organisatorio ta?

Bo por mira e Instituto pa Derecho Humano komo un organisashon ku tres parti: e Hunta di Konseho, e miembronan di Instituto, i e Ofisina.

Hunta di Konseho

E Hunta di Konseho ta evaluá e plannan di e Instituto pa protehá derechonan humano. E ta yuda tambe determiná kua personanan por wòrdu nombrá komo miembro di e Instituto. E miembronan di e Hunta di Konseho no ta traha pa e Instituto diariamente. E Konseho ta reuní algun biaha pa aña pa duna konseho.

E miembronan di Instituto 

E miembronan di e Instituto ta huzga e kehonan di diskriminashon entregá na Instituto. Nan ta determiná tambe e strategia i maneho di e Instituto. Tambe nan ta kompartí nan konosementu di derecho humano, por ehèmpel, pa medio di diskurso òf den medionan di komunikashon.

E miembronan permanente di Instituto tin konosementu tokante vários tópiko di derecho humano i ta wòrdu nombrá dor di Rei. Esaki ta inkluí e presidente (Rick Lawson) i e visepresidente (Pollyan Spoon). Tambe tin e miembronan suplente di Instituto ku ta yuda e miembronan di Instituto permanente den nan trabou. Lei ta stipulá un kantidat máksimo di miembro permanente di Instituto. Pues, e miembronan suplente di Instituto ta importante pasobra nan ta ofresé konosementu i ekspertisio adishonal riba vários tópiko. E miembronan suplente por evaluá tambe si diskriminashon a tuma lugá.


Dos miembro suplente di e Instituto ta biba i traha na Hulanda Karibense. Nan ta atendé kehonan di diskriminashon di Boneiru, Sint Eustatius, i Saba: Solange Christiaan i Gerald Simmons-de Jong.

Ofisina

E Ofisina ta realisá trabounan diario i ta wòrdu enkabesá pa direktor Wilco de Jonge. Mas o ménos 100 empleado ta traha riba desishon, investigashon, konseho, komunikashon i organisashon interno.

Bou di kiko e Instituto ta kai?

E Instituto ta eksistí na Hulanda for di 2012 i ta independiente den su tareanan segun lei. Entrante 2026, e Instituto su ròl lo ekspandé tambe den Hulanda Karibense, ya ku e lo por huzga kehonan di diskriminashon na e islanan.

E ministerio di Hustisia i Seguridat (J&V) ta proveé ​​e finansiamentu básiko di e Instituto. Pa Hulanda Karibense, ministerio di Interior i Relashonnan den Reino (BZK) tambe ta kontribuí. Pa proyektonan spesífiko, e ministerionan di Salú, Bienestar i Deporte (VWS), Enseñansa, Kultura i Siensia (OCW), i Asuntunan Eksterior tambe por ta enbolbí.