Na fin di 2024, Instituto pa Derecho Humano a presentá su plan anual 2025 pa Hulanda Karibense. E puntonan klave di e plan aki ta:
1. Bon preparashon pa ehekushon di huisio
Dia 1 di yanüari 2026, e legislashon di trato igual ta drenta na vigor na Hulanda Karibense. Esei ta nifiká ku entrante e fecha ei, habitantenan di e islanan ku tin keho di diskriminashon por tuma kontakto ku e Instituto. Nan por pidi un desishon tokante si diskriminashon a sosodé. E tarea desisivo aki mester ta bon prepará. Pa sigurá ku e ta apropiá pa e kultura i konteksto na e islanan. Komo ku e islanan ta komunidatnan chikitu i estrecho, hopi biaha hende konosé otro personalmente. P’esei e Instituto ta spera di, por ehèmpel, hasi uso tambe di un mediadó den vários kaso en bes di semper emití un desishon mesora.
2. Konsehá i enkurashá mas desaroyo
E Instituto lo sigui enfoká riba kombatimentu di pobresa i diskriminashon na Hulanda Karibense. Derechonan igual pa hende ku limitashon i kombatimentu di violensia kontra hende muhé i mucha muhé tambe ta keda tópikonan importante. Dos tópiko ku e Instituto tin intenshon di eksplorá mas aleu ta:
Kambio di klima i polushon di medio ambiente tin konsekuensia direkto pa derechonan humano. Esaki ta inkluí e derecho di ta salú, awa limpi, seguridat di kuminda i un ambiente di biba seif. E Instituto ta monitoreá si e derechonan aki ta protehá adekuadamente, inkluso den lei i regulashon relashoná ku klima. Na Hulanda Karibense, e riesgonan di kambio di klima ta partikularmente signifikante: nivel di laman ta subi, periodonan di sekura ta bira mas largu, i refnan di koral ta muriendo. P’esei e Instituto ta kere ku kambio di klima mester ta un komponente permanente di maneho pa e islanan. E Instituto ta investigando tambe kon e por hunga un ròl riba e tereno aki.
Esaki ta enserá, por ehèmpel, hende den prizòn òf fasilidatnan di kuido será. Pa derechonan humano, ta importante pa prevení trato inhumano den e situashonnan aki. Un tratado internashonal yamá OPCAT (Optional Protocol to the Convention against Torture) ta eksistí pa e propósito aki. E Instituto ta investigando si esaki por ta aplikabel tambe pa Hulanda Karibense.
3. Sigui desaroyá informashon, retnan i komunikashon
Pa por hasi e trabou na Hulanda Karibense bon, ta importante pa tin mas tantu bon kontakto posibel na e islanan i pa duna informashon. E Instituto ke sigui desaroyá esaki dor di organisá asina yamá “town hall meetings” i anochinan di informashon. Tokante legislashon di trato igual i derecho humano en general. Ademas e Instituto ta trahando tambe riba komunikashon tokante derecho humano i kiko e Instituto por nifiká pa habitantenan di e islanan. Riba e wèpsait aki i riba Facebook, kaminda nos lo usa videonan kòrtiku ku splikashon, entre otro.