E Instituto pa Derecho Humano kier pa tur hende na Hulanda wòrdu tratá hustu, sea bo ta biba na Hulanda Oropeo òf Karibense. Tur hende mester por partisipá, ta nan mes, i wòrdu tratá ku rèspèt.
Ta p’esei e Instituto ta komprometé su mes na derecho humano. Nos ta vigilá i pèrkurá pa e derechonan aki wòrdu respetá. Tambe nos ta splika kiko ta derecho humano. Nos ta hasi esaki independientemente i na un manera imparsial.
Pa garantisá ku derecho humano ta konta pa tur hende, kambio duradero ta nesesario. E kambio aki mester tuma lugá riba kuater nivel. Solamente ora tur e komponentenan aki funshoná bon, i konhuntamente, derecho humano por floresé di bèrdat:
1. Un fundeshi sano
Derecho humano mester ta debidamente ankrá den lei, maneho i institutonan (p.e., organisashonnan di gobièrnu). Esaki ta garantisá un fundeshi sólido.
2. Implementashon den bida diario
Derechonan humano no mester ta solamente riba papel pero tambe visibel den práktika: na skol, na trabou, den gobièrnu i den kuido.
3. Un kultura di rèspèt pa tur hende su derechonan humano
Tur hende mester trata derechonan humano konsientemente i ku rèspèt. Ta e ora ei so nos por hasi esfuerso pa sostené balornan manera igualdat, libertat i dignidat. P’esei nos mester sigui promové esaki.
4. Espasio pa krítika
Derechonan humano ta rekerí un sosiedat habrí i liber den kua siudadanonan, medionan di komunikashon i organisashonnan por ekspresá nan opinion. I den kua derechonan humano ta forma un parti importante di debate públiko i polítika.